| Lugar | lugar de Lestrobe. |
| Parroquia | Santa Mª de Dodro |
| Construción | Pazo do século XVI |
Descrición
Construído pola familia Quiroga, antiga casa soarega da Diocese de Lugo, e, a partir de mediados do século XVIII, antiga residencia de descanso dos arcebispos composteláns, con escudo cos emblemas episcopais.
No século XVIII, o pazo foi obxecto de sucesivas remodelacións por parte da Igrexa, quen o adquiriu (entre 1751 e 1772), xunto coa capela e os terreos, por permuta de bens e de rendas patrimoniais, sendo a súa arquitectura actual do tipo barroco compostelán. A Capela do Anxo da Guarda e a magnífica fonte barroca da entrada, cunha pía e tres alturas coroada coa figura de Santiago Peregrino, foron construídas, así mesmo, na segunda metade do século XVIII polo Arcebispo Felipe Fernández Vallejo. No ano 1855, coa desamortización de Mendizábal, o pazo e as súas pertenzas foron mercados polo madrileño Bernardo Arbizu. Xa no século XX o atopamos en mans de Manuel Lorenzo del Río, veciño de Padrón, quen, en 1916, llo volve a deixar en testamento á mitra compostelán baixo unha serie de condicións. Xa máis recentemente, no ano 2005, foi restaurado, sendo na actualidade un hotel de catro estrelas, con pombal, hórreo e rodeado dunha grande finca duns 7000 m2
O edificio, de gran envergadura, presenta planta en U, cunha longa fachada principal totalmente simétrica e moi harmoniosa, resaltando portas e fiestras con molduras barrocas. A capela, con advocación ó Anxo da Garda, é visible nun lateral, no interior da cal gárdase unha importante talla a tamaño natural da Dolorosa, obra do escultor Ferreiro. O patio está pechado por altos muros, e conta con diversas dependencias auxiliares. O conxunto aparece rodeado dunha grande finca con emparrados, árbores froiteiras e unha grande extensión forestal. Actualmente celébrase na capela e no patio fronte o pazo a festa dos Aflixidos, no mes de agosto
